काठमाडौँ । सामाजिक सञ्जाल टिकटकमा हतियारसहितका भिडियो सार्वजनिक गरी समाजमा डर र त्रास फैलाएको आरोपमा बाँके प्रहरीले दुई जनालाई पक्राउ गरेको छ।
प्रहरीका अनुसार नेपालगन्ज उपमहानगरपालिका–४ का ३० वर्षीय अजय कुमाल र डुडुवा गाउँपालिका–४ का २६ वर्षीय अनिल खटिक पक्राउ परेका हुन्। उनीहरूले आफ्नो टिकटक आईडीमार्फत हातमा हतियार समातेको र सर्वसाधारणलाई आतंकित पार्ने खालका गतिविधि देखिने भिडियोहरू पोस्ट गरेका थिए।
जिल्ला प्रहरी कार्यालय बाँकेका अनुसार अजय कुमालले ‘Ajay Magar’ र अनिल खटिकले ‘Anilsonkhar’ नामक टिकटक आईडी प्रयोग गर्दै त्यस्ता सामग्री सार्वजनिक गरेका थिए। आम जनमानसमा असुरक्षाको भावना फैलाउने खालका दृश्य पोस्ट गरेपछि प्रहरीले निगरानीमा राखेर उनीहरूलाई नियन्त्रणमा लिएको जनाएको छ।
